Monday, February 26, 2018

ለመነኰሳቱ አቤቱታ ማ/ቤቱ መልስ እንዲሰጥ ታዘዘ፤ ምስክር ይሰማባቸዋል፤“ያልነበረ ጉስቊልና ይስተዋልባቸዋል”

  • ማረሚየ ቤቱ፣ ለካቲት 30 ቀን መልስ እንዲሰጥ ታዘዘ፤
  • የዐቃቤ ሕግ ምስክሮችን ለመስማት ለመጋቢት 18 ቀን ቀጠሮ ተያዘ፤
28166839_1981266108569045_7091172735053479014_n
የ“ሽብር” ክሥ ተመሥርቶባቸው በቂሊንጦ እስር ቤት የሚገኙት ኹለቱ የዋልድባ ገዳም መነኰሳት፣ ልብሰ ምንኵስናቸውን እንዲያወልቁ እየተገደዱ እንዳሉ በጽሑፍ ላቀረቡት አቤቱታ፣ እስር ቤቱ ለየካቲት 30 ቀን መልስ እንዲሰጥ የፌዴራሉ ከፍተኛ ፍ/ቤት አዘዘ፡፡
በእነተሻገር ወልደ ሚካኤል የክሥ መዝገብ 4ኛ ተከሣሽ የኾኑት አባ ገብረ ኢየሱስ ኪዳነ ማርያም እና 5ኛ ተከሣሽ አባ ገብረ ሥላሴ ወልደ ሃይማኖት፣“ልብሰ ምንኵስናችንን አናወልቅም” በማለታቸው ባለፉት ቀጠሮዎች ያልቀረቡ ሲኾን፣ በቅጣት ቤት እንደሚገኙ በአቤቱታቸው ገልጸዋል፡፡ “የኹለቱም መነኰሳት አካል ላይ ባለፉት ጊዜያት ያልነበረ ጉስቊልና ይስተዋላል፤” ብሏል የዛሬ ሰኞ የካቲት 19 ቀን የችሎት ውሏቸውን የተከታተለው ጋዜጠኛ ጌታቸው ሺፈራው፡፡
†††
   
የዋልድባ መነኮሳት ምስክር ሊሰማባቸው ነው
በእነ ተሻገር ወልደ ሚካኤል የክሥ መዝገብ የ”ሽብር” ክሥ የተመሠረተባቸው የዋልድባ መነኮሳት፣ ለመጋቢት 18 ቀን 2010 ዓ.ም. ምስክር ይሰማባቸዋል፤ ተብሏል።
 
በእነ ተሻገር ወልደ ሚካኤል የክሥ መዝገብ ተከሠው ከነበሩት 35 ተከሣሾች መካከል 32ቱ ክሣቸው ተቋርጦ የተፈቱ ሲኾን፣ 2ኛ ተከሣሽ ነጋ ዘላለም መንግሥቴ፣ 4ኛ ተከሣሽ አባ ገ/ኢየሱስ ኪ/ማርያም እና 5ኛ ተከሣሽ አባ ገ/ሥላሴ ወ/ሃይማኖት ብቻ ክሣቸው ቀጥሏል።
 
የዛሬው የካቲት 19/2010 ዓ.ም. ቀጠሮ ተይዞ የነበረው በመዝገቡ ከተቆጠሩት ምስክሮች መካከል ጉዳያቸው ይቀጥላል በተባሉት 3ቱ ተከሣሾች ላይ የሚቀርቡትን ዐቃቤ ሕግ ለይቶ እንዲያስመዘግብና መነኮሳቱ ባቀረቡት አቤቱታ ላይ ትእዛዝ ለመስጠት ነበር። በዚህም መሠረት 1ኛ፣ 2ኛ እና 4ኛ ምስክሮች በመነኮሳቱ እና በ2ኛ ተከሣሽ አቶ ነጋ ዘላለም ላይ ይመሰክራሉ ተብሏል። የዐቃቤ ሕግ ምስክሮችን ለመስማትም ለመጋቢት 18 ቀን ቀጠሮ ተይዟል።
 
በሌላ በኩል፣ የቂሊንጦ እስር ቤት፣ መነኮሳቱ የምንኩስና ልብሳቸውን እንዲያወልቁ እንያስገደዳቸው መኾኑን ለፍርድ ቤት አቤቱታ ያቀረቡ ሲኾን፣ እስር ቤቱ ለካቲት 30 ቀን መልስ እንዲሰጥ ታዟል።
 
4ኛ ተከሳሽ አባ ገ/ኢየሱስ ኪ/ማርያም እና 5ኛ ተከሳሽ አባ ገ/ሥላሴ ወ/ሃይማኖት፣ “ልብሳችንን አናወልቅም” በማለታቸው ባለፉት ቀጠሮዎች ያልቀረቡ ሲኾን፣ በአቤቱታቸው ላይ ቅጣት ቤት እንደሚገኙ መግለጻቸው ይታወሳል። የኹለቱም መነኮሳት አካል ላይ ባለፉት ጊዜያት ያልነበረ ጉስቁልና ይስተዋላል።
Source: haratewahido


Let's save waldba! together ዋልድባ እንታደግ!

No comments:

Post a Comment