Monday, February 26, 2018

ልብሰ ምንኵስናቸውን እንዲያወልቁ ጫና የተደረገባቸው የዋልድባ መነኰሳት ለፍ/ቤት በጽሑፍ ያቀረቡት አቤቱታ

28166839_1981266108569045_7091172735053479014_n27972350_1257453024398123_1419641619183814929_n
  • የእምነት ልብሳችንን ከምንቀይር የሥጋ ሞታችንን እንመርጣለን፤
  • “አልባሳታችን የምናወልቀው ስንሞት ብቻ ነው። ከዚህ ውጭ ይህን አልባሳታችንን እንድንለውጥ መገደድ ማለት ለእኛ እምነታችንን እንድንሽር፣ በእግዚአብሔር ስም የተሰጠንን ክብር እንዲዋረድ ማድረግ ነው፤”
  • 5ኛ ተከሳሽ የሆንኩት አባ ገብረ ሥላሴ ወልደ ሃይማኖት ወደዚህ ፍ/ቤት ለመምጣት የእምነት ልብሴን እንዳወልቅ ስጠየቅ አላወልቅም በማለቴ ማዕርጋቸውንና የአባታቸውን ስም ያላወቅኋቸው ነገር ግን የደኅንነትና ጥበቃ ሓላፊ መሆናቸው የሚታወቁ ገብረ እግዚአብሔር የተባሉ የእስር ቤቱ ሓላፊ እያዩና ራሳቸው እያገዙ ተፈሪ የተባለ ወታደር የጎማ ዱላ በመያዝ ወደ አንድ ሰዋራ ቦታ ሊወስደኝ ሲሞክር ምሶሶ ላይ ተጠምጥሜ እምቢ ብልም ልብሴን ከላየ ላይ ለመግፈፍ በኃይል እየጎተተ ያንገላታኝ ከመሆኑም በላይ አቅም አንሶኝ ከመሬት ወድቄ ከእነ ልብሴ መሬት ላይ ጎትቶኛል፤
  • መነኰሳቱ፣ ነገ የካቲት 19 ቀን ቀጠሮ ያላቸው ሲሆን አቤቱታውም ለፍርድ ቤቱ ደርሷል
 †††
የዋልድባ መነኰሳት ለፍርድ ቤት ያቀረቡት አቤቱታ ሙሉ ማመልከቻ
 
የካቲት 13 ቀን 2010 ዓ.ም.
 
የኮ/መ/ ቁጥር 197866
 
ለፌደራል ከፍተኛ ፍርድ ቤት 4ኛ ወንጀል ችሎት
 
አዲስ አበባ
 
ከሣሽ፡- የፌደራል ዐቃቤ ሕግ
 
ተከሣሾች፡- እነ ተሻገር ወልደ ሚካኤል
 
ጉዳዩ፡- በእስር ቤት አያያዝ ላይ 4ኛ እና 5ኛ ተከሣሾች እየደረሰብን ያለውን በደል ስለማመልከት ይመለከታል
 
አመልካቾች በዋልድባ ገዳም መነኮሳት ስንሆን ወንጀል ፈፅማችኋል በሚል ክስ ቀርቦብን በቂሊንጦ የቀጠሮ እስረኞች ማቆያ በእሰር ላይ እንደምንገኝ ይታወቃል።
አመልካቾች መነኮሳት እንደ መሆናችን ሃይማኖታችን የሚያስገድደንን የራሳችን አልባሳት እንጠቀማለን። ይህን አልባሳታችን የምናወልቀው ስንሞት ብቻ ነው። ከዚህ ውጭ ይህን አልባሳታችንን እንድንለውጥ መገደድ ማለት ለእኛ እምነታችንን እንድንሽር፣ በእግዚያብሔር ስም የተሰጠንን ክብር እንዲዋረድ ማድረግ እንደሆነ ይሰማናል። በመሆኑም የእምነት ልብሳችንን ከምንቀይር የስጋ ሞታችንን እንደምንመርጥ ለእስር ቤቱ አስተዳዳሪዎች በተደጋጋሚ ግልፅ አድርገናል። ይሁን እንጅ የእስር ቤቱ አስተዳደር መጀመርያ ላይ ተቃውሟችንን የተቀበለ የመሰለ በመሆኑ በእኛ በኩል ለዚህ ፍርድ ቤት አቅርበን የነበረውን አቤቱታ ሳንገፋበት ቀርተናል።
 
ከቅርብ ጊዜ ወዲህ ግን የእስር ቤቱ አስተዳደር አልባሳቱን እንድናወልቅ ከፍተኛ ጫና እያደረገብን ከመሆኑም በላይ ለከፍተኛ እንግልትና መዋረድ ተዳርገናል። ይኸውም፡-
 
  • 5ኛ ተከሳሽ የሆንኩት አባ ገ/ሥላሴ ወ/ሃይማኖት ወደዚህ ፍ/ቤት ለመምጣት የዕምነት ልብሴን እንዳወልቅ ስጠየቅ አላወልቅም በማለቴ ማዕረጋቸውንና የአባታቸውን ስም ያላወኳቸው ነገር ግን የደህንነትና ጥበቃ ኃላፊ መሆናቸው የሚታወቁ ገ/እግዚያብሔር የተባሉ የእስር ቤቱ ኃላፊ እያዩና እራሳቸው እያገዙ ተፈሪ የተባለ ወታደር የጎማ ዱላ በመያዝ ወደ አንድ ሰዋራ ቦታ ሊወስደኝ ሲሞክር መሰሶ ላይ ተጠምጥሜ እምቢ ብልም ልብሴን ከላየ ላይ ለመግፈፍ በኃይል እየጎተተ ያንገላታኝ ከመሆኑም በላይ አቅም አንሶኝ ከመሬት ወድቄ ከእነ ልብሴ መሬት ላይ ሲጎትተኝ በሌሎች ሀይ ባይነት የከፋ ጉዳት ሳይደርስብኝ ተርፌያለሁ። ያም ቢሆን በእምነቴ መፅናቴ እንደ ጥፋት ተቆጥሮብኝ ለአንድ ወር ያህል መቀጣጫ በሆነው ዞን 5 በከፋ ሁኔታ እንድቆይ ተደርጌያለሁ።
  • 4ኛ ተከሳሽ የሆንኩት እኔ አባ ገ/ኢየሱስ በተመሳሳይ ችግር እየደረሰብኝ ይገኛል። በአሁኑ ጊዜ ሁለታችንም ተለዋጭ ልብስ እንዳይገባልን ተከልክለን በላያችን ላይ ያለው ልብስ በእጅጉ ቆሽሾ በጤናችን ላይ ችግር እያስከተለ ይገኛል። በሌላ በኩል 4ኛ ተከሳሽ በአሁኑ ጊዜ ፈፅሞ ባለወኩት ምክንያት እና ለምን ያህል ጊዜም እንደምቆይ ባለወኩበት ሁኔታ በቅጣት መልክ ዞን 5 እንድቆይ ተደርጌያለሁ። ይህ ቦታ ጥፋት ፈፅሟል የሚባል እስረኛ በቅጣት መልክ ለተወሰነ ጊዜ እንዲቆይ የሚደረግበት እጅግ አደገኛ እና ለከፍተኛ አካላዊና ስነ ልቦናዊ ጉዳት የሚዳርግ መሆኑ በግልፅ የሚታወቅ ነው።
 
በአጠቃላይ አመልካቾች በተከሰስንበት ጉዳይ ይህ ፍርድ ቤት ሊሰጥ የሚችለው ውሳኔ እንደተጠበቀ ሆኖ ከዚህ አስቀድሞ በእስር ቤት እየደረሰብን ያለው በደል ግን እምነታችንን የሚያዋርድ እና ስብዕናችንን የሚነካ በመሆኑ ይህ ፍርድ ቤት ቀደም ሲል ያቀረብነውን አቤቱታ ጭምር በማየት የአገሪቱ ሕገ መንግስት ለሀይማኖት ነፃነት የሰጠውን ጥበቃ መሰረት በማድረግ በደል የፈፀሙብን የእስር ቤቱ ሰራተኞችና ኃላፊዎች ላይ እርምጃ እንዲወስድልን እንዲሁም በእስር ቤቱ አስተዳደር ላይም መብታችን የሚያስከብር ትዕዛዝ እንዲሰጥልን እናመለክታለን፡፡
 
1ኛ) አባ ገ/ኢየሱስ ኪ/ማርያም
 
2ኛ) አባ ገ/ሥላሴ ወ/ሃይማኖት
 
መነኰሳቱ ነገ የካቲት 19 ቀጠሮ ያላቸው ሲሆን አቤቱታውም ለፍርድ ቤቱ ደርሷል::
ምንጭ፡- Getachew Shiferaw
Let's save waldba! together ዋልድባ እንታደግ!

No comments:

Post a Comment